Mere dil ki zamin par hai qadam Zahara ke bachchon ka
Meri naslon pe hai dast e karam Zahara ke bachchon ka
Zamane ka koyi bhi gham use ruswa nahin karta
Sukunat pale jis seene main gham Zahara ke bachchon ka
Hazaron koshishen karlin zamane main jhukane ki
Magar jhukne nahin deta bharam Zahara ke bachchon ka
Nabi ke deen ki khatir kiye qurban bahattar sar
Bhulaaen kis tarah aehsan ham Zahara ke bachchon ka
Hazaron didawar Sadke Zamin e Karbala tujh par
Teri nazron ne dekha hai azam Zahara ke bachchon ka
Khuda ke fazl se izn e ziyarat ka sharaf paya
Zah e qismat main dekh aaya Haram Zahara ke bachchon ka
Gulistan e payambar ka har aek gul hai gul e tanvir
Mumasil hi nahin Rab ki qasam Zahara ke bachchon ka